واحد صاحبي ابوه حلف عليه لازم ولابد انه يتجوز بنت عمه ...

بيقولي مبيحبهاش واتجوزتها مُضطر ..

وانه من بداية جوازهم وهو معندوش قبول تجاهها ..

انت متخيل يابني انك متجوز واحده شبه عمك ؟! ;d ..

بس هعمل ايه حُكم القوي ..

جيت في يوم متأخر من الشُغل فتحتلي وعملت تصرف غريب قشعرلي بدني .. "

باست ايدي وقالتلي وحشتني " انا حسيت اني قليل قوي فـ نظر نفسي ..

قررت اكتبلها جوابات حُب واعلقها ع التلاجه اهو افرحها بكلمه حلوه وخلاص حتي ولو مبحبهاش ..

اجيبلها هديه او ورد وانا جاي .. اعملها شاي ..

البت بدأت ربنا يحليها ف عيني ي .. وشها بدأ ينور .. كُل لما اقولها كلمه حلوه الاقي شكلها يبقي اجمل ..

بقيت احافظ علي مشاعرها واحسس ع الكلمه قبل لما اقولها ..

كأنها وردايه وعماله تفتح من جديد واهتمامي بيها زي الميه اللي بترويها وتخليها تفتح اكتر ! ..

اخدها اخرجها .. ابصلها احس اني شايف قدامي قمر مش بنت عمي خالص .. من الواضح الكلمه الحلوه

والمحافظه ع المشاعر مفعولهم جبار يا اخي ! انا حبتها .. اقسملك بالله حبتها . !



سيدنا أنس بن مالك خادم النبي صلي الله عليه وسلم ..

كان لُه أخ يتيم اسمه عُمير .. فـ النبي جاب لُعمير طير صغير يلعب بيه وسماهوله " النُغير ".. المُهم ..

النبي كل يوم يعدي علي عُمير يلاقيه بيلعب مع الطير بتاعه .. فـ يضحكله ويقوله : يا عُمير ! ماذا فعل النُغير ؟!

اخبار الطير بتاعك ايه ؟ يقوم عمير ضاحك .. كل يوم النبي يقوله كدا .. وفـ ليله النبي معدي علي عُمير


وقاله " يا عمير ماذا فعل النغير ؟! " عمير بكي وقال للنبي " يا رسول الله .. مات النغير " الطير بتاعي مات ! ..

فـ النبي قعد جنب عمير علي الارض وربع رجليه وفضل يلعب معاه .. فـ الصحابه شافوا النبي واستغربوا !!

مااااذااا تفعل يا رسول الله ؟!! ايه اللي بتعمله دا !! .. قالهم " مات النغير .. فجلست ألاعب عُمير " !! شايف

كمية مراعاة المشاعر وجبر الخواطر ؟! .. والنبي مكتفاش بكدا .. لاء .. تاني يوم راح لعمير بيته وقعد معاه

يعزيه ويواسيه ويقوله كلام حلو يخفف عليه الحُزن بسبب موت الطير بتاعه .. ومش بس كدا .. دا النبي

قام صلي ركعتين وهو في بيت عُمير ودعي ربنا انه يصبر قلبه ويهون عليه !!



إديسون مخترع المُصباح الكهربي ..

اترفد من مدرسته والحجه انه طفل غبي " كتبوا جواب لامه يقوللها ابنك غبي جدًا وزمايله هيتعلموا

الغباء منه و فصلوه .. اديسون امه بدأت تمنعه من المرواح للمدرسه .. سألها عن السبب ؟! قالتله لانك

أذكي من جميع زمايلك ومنتاش محتاج لمدرسه .. انت عظيم .. إديسون بيقول انا صدقت كلام امي واني

ذكي وعظيم .. كانوا شايفين ان عقله مظُلم مينفعش للتعليم .. لكن بكلام امه الحلو ومراعاة مشاعره ..

نور العالم باختراعه !


سيدنا عكرمه بن أبي جهل .. ابوه " أبو جهل " من اكتر الناس اللي كانوا بيكرهوا الاسلام .. لما سيدنا

عكرمه أسلم .. النبي نهي الصحابه انهم يجيبوا سيرة أبو جهل بأي سوء قدام سيدنا عِكرمه .. وقالهم ان

الشتيمه هتوجع ابنه ومشاعره .. ومُش هتوصل لابو جهل !! .. فـ حافظوا علي الفاظكم !!



الخليفه العباس ..

كان بيتمشي مع زوجته فـ حديقة القصر بتاعه ..

فـ وهُما وافقين علي البير سوا .. واضح ان الخاتم بتاعها كان واسع عليها .. فجأه فلت من ايدها وقع فـ البير ..

الخليفه العباس فورًا قلع الخاتم بتاعه ورماه ف البير .. فقالتله " لماذا فعلت ذلك يا امير المؤمنين ؟!

ليه رميت الخاتم بتاعك ؟! .. قالها " خِفت ان يشعر خاتمك بالوحده فأردت ان اجعل خاتمي رفيقًا له " !

بتقول زوجته " انها طول حياتها منسيتش حلاوة كلام الخليفه ليها في الليله دي .



مراعاة المشاعر والكلمه الحلوه يا جماعه الله يحلي أيامكم .. الست ممكن يكون طالع عينيها فـ شغل

البيت .. ولما راجلها يطبطب عليها ويقولها " شيلاني وشايله عني الله يديمك نعمه ويبوس دماغها "

وربي بتنسي كُل تعبها ! ابنك بيذاكر متقولوش منتاش نافع " اعمله القهوه بايدك وقوله انا معتمد علي

الله ثم عليك وكُل اللي يجيبه ربنا كويس .. الحُب عامل زي السبرتو .. لابد تحافظ عليه بانك تغلفه "

بالاهتمام " بدل لما يطير منك .. دا النبي قال ان الكلمه الطيبه بتتحسبلك صدقه وربنا بيقول " وقولوا

للناس حُسنًا " ! .. امدح فـ لبس اصحابك واذواقهم ابعتلهم رساله دلوقت مضمونها كلمتين " أنا بحبك " ! ..

الكلمه الحلوه بتلزق فـ القلب زي طابع البوسطه .. راعوا المشاعر وقدروا .. تصرفات بنشوفها تافهه جدًا

الا انها بتفرق عند غيرنا ومبتتنسيش .. الواحد لو حب واتحب بيحلو ووشه بيفتح زي الوردايه.. في يوم

قولت لوالدتي تعرفي ان اجمل شيئ فـ الدُنيا ان الانسان يحب ! قالتلي تعرف ايه الاجمل ؟! ان الانسان

اللي بتحبه يبادلك نفس الاحساس فيراعي مشاعرك ويحبك . : ) !