تويت
..
الكلام اللي هقوله مش هيخص الهجرة بس لكن هيخص كل حاجه وكل هدف نفسنا نحققه في حياتنا مهما كان نوع الهدف ده ومن واقع لتجارب شخصية حصلت معايا !!
ما تضيعش وقتك في كلام فاضي وابعد عن المحبطين وخليك واثق في ربنا اول شيء ثم في قدراتك وطموحك واعرف انك بني ادم ربنا كرمك وخلا عندك عقل تقدر تحقق بيه اي حاجه في الدنيا طول ما انت عندك (هدف) وبتشتغل عليه ... وحط تحت كلمة بتشتغل عليه الف خط ..
متسألش امتي هنجح وانا ليه مش بنجح وانا ليه ظروفي صعبة ... كل ده مش بتاعك ولا من حقك تسأل عليه طول ما انتا لسا مشتغلتش صح على نفسك
============================
متزعلش لو ظروفك صعبه - متزعلش لو حالتك المادية مش متظبطة - متزعلش لو سيبت شغلك لاي سبب متزعلش لو اتخدعت في ناس معينة متزعلش متزعلش متزعلش ....
-- ربنا بيقفل في وشك باب معين عشان ينور بصيرتك وطريقك لحاجات تانية انت مش اخد بالك منها ... عشان يعلمك دروس معينة ويأهلك ويديلك فرصة تتمرن صح وتخوض التجارب والصعوبات والمشاكل والظروف القاسية .. وبعدها هيفتحلك 100 باب بس وقت ما يشوفك انت مستعد لده ومستعد لمرحلة جنى الثمار وتستحق النجاح المهم لازم تحدد هدفك وتحطه قدام عينك وكل يوم تحاسب نفسك ... هل انا بقرب من هدفي ولا ببعد عنه !!
النجاح في حد ذاته ليه خطورة كبيرة عن الفشل لأنه بيكشفلك اعدائك الحقيقيين اللي عمرهم ما هيناموا ولا هيرتاح بالهم طول ما انت بتكبر قدامهم وبتنجح ..
وهتتعرض لاذي كتير لكن صدقني هتحس بطعم جميل لما تلاقي او تسمع ان حد بيهاجمك او حد بيتكلم عليك او حد بيقول عنك كلام مش حلو ساعتها هتشكر ربنا ان نجاحك بقى ليه صدى وتأثير على اللي حواليك ... والا مكنش حد افتكرك من الاساس ..
وهتفرح اكتر لما تحس انك بقيت مهم عندهم اكتر من اي حاجه تانية في حياتهم وهتعرف كويس تتعامل مع النوعيات دي من الناس لان خلاص ربنا علمك وحطك في اختبارات كبيرة وسكة طويلة مع مشوار فشل قدرت تخرج منه بحصيلة علمية وعملية محترمة
=======================
ظروفك الصعبة دلوقتي هي مفتاح وصولك لهدفك ونجاحك ...وبداية الطريق والدورة التأهيلية اللي ربنا حطك فيها عشان تبقي مستعد نفسيا وعقليا للحظة وصولك لهدفك مهما كان هو ايه !
-- لو النجاح بالساهل من غير تعب وكفاح وفشل بدل المرة عشره يبقي صدقني الفشل هيجي اسهل واسرع منه ..
.
ابعد عن المحبطين والناس اللي بتهبطك لان ده امر طبيعي .. الناس دول موجودين حواليك دلوقتي عشان يحبطوا فيك ويعطلوك..مش كرها فيك بالعكس دول بيحبوك وفي منهم صحابك وقرايبك وحبايبك .. ولكن غريزة في بعض البني ادمين ومبدء (( هو انا ليه اكون فاشل لواحدي ؟)) لازم يشدوك انت كمان للفشل او لعدم تحقيق اهدافك ..ونبقى كلنا في الهوا سوا !!
:dطول ما انت لسا على قدك وصغير واحلامك سراب .. هيفضلوا يحبطوا ويشدوك لتحت معاهم .. ولما تنجح هتلاقيهم اول ناس بتباركلك وبتمشي ورا ضلك
========================
فنصيحتي ليكم ولوجه الله ومن تجارب شخصية كتيرة ..متسمعش لكلام حد وامحي اي شخصية سلبية من حياتك وابعد عن النوعية دي لان الطاقات السلبية مش حلوة بالمرة وانا بعتبرها حاجه بشعة ممكن تنزلك سابع ارض لو استسلمت ليها .. ولو مش هتقدر تبعد عن الاشخاص المحبطين والتعبانين اللي في حياتك لو هما قريبين منك اوي يبقي بطل تتكلم عن حياتك كتير معاهم .
ابدأ اشتغل على نفسك ليل نهار وميعديش يوم الا لما تحاسب نفسك وتشوف هل انت كده ماشي صح وبقرب من هدفي ولا لاء ؟
ولو هنرجع نتكلم عن الهجرة .. اتحداك لو تلاقي واحد هاجر من غير ماكان طلع عينه .. وداق الذل وسهر الليالي ...