تويت
عاوز تهاجر او تسافر ومحتار تبدء منين وتعمل ايه؟!
نقلا عن / Mohamed Tarek
بسم الله الرحمن الرحيم
البوست دة معمول عشان الناس اللي عاوزة تسافر و هي لسة مش عارفة هتاخد انهي طريق و الناس
اللي بعضهم لما بيقرأ طرق الهجرة بيجيله احباط ميعرفش ان فيه طرق تانية مختلفة و ان كل مجال و
ليه سكته و كل واحد بياخد سكة الهجرة علي حسب امكاناته المادية و العلمية
لو عاوز تهاجر او تسافر تشتغل اكيد فيه حل..مهما كانت امكانياتك ف فيه حل ف النهاية !
في البوست دة هافرق الناس كل واحد علي حسب مقدرته المادية و امكانياته العلمية كل واحد و نوع هجرته و للبلد المناسبة اللي يبحث فيها و طريقة سفره :
اولا
لو انت دكتور بشري او صيدلي..
قدامك حاليا طريقين لو انت خبرة وسنك ما بين 28 - 40 ف امشي في
طريق استراليا..المعادلة و اللغة الانجليزية و كمل و الموضوع هيمشي معاك
اما لو لسة ف الكلية و متخرج جديد ف مش قدامك الا طريقين :
الاول لو معاك فلوس تقدر تبدا تدرس لغة الماني و تقدم علي فيزا بحث عن عمل او تقدر تراسل مستشفيات هناك تاخد تدريب و تعمل بحث طبي هناك.
بالنسبة للصيادلة تقدر تدرس ماستر في المانيا في اي علم من علوم الصيدلة زي البيوكيمستري
بعدها تجيب شغل في مجالك و تاخد الاقامة الدايمة .
اما لو مش معاك فلوس ف الحل انك تروح الخليج هتجمع خبرة و فلوس بعدها تمشي في موضوع المعادلة الاسترالية.
ثانيا لو انت مهندس او خريج حاسبات و معلومات او معيد ف الجامعة او بترول و او هندسة طبية او تعدين او علوم
نادرة ف ادامك فرصة حلوة جدا لكندا...هجرة كندا يا جماعة دلوقتي مش لاي حد ..بمعني ان التخصصات
النادرة هتقدر تهاجر بسهولة..ممكن تمشي ف هجرة استراليا بس كندا هتكون اسهلك لان مش
هتعمل معادلة للشهادة ف حالة الهجرة لكندا..هتبدا تدور علي المقاطعات اللي طالبة مهنتك و تجهز
لامتحان الايلتس و تجهز ورقك و تقدم و خلي بالك المقاطعات دي بتفتح ف اوقات معينة فلازم تتابعها
كويس عشان اول الموقع ما يفتح تقدم علي طول قبل الهنود و بتوع شرق اسيا ما يسبقوك !
تقدر تدرس فرنساوي و تقدم علي مقاطعة كيبيك و دي سهلة الي حد ما من هجرة المقاطعات التانية و
طالبة مهندسين مدني كتير و معماري هيكون كويس ليك و هيزود فرصتك ف كندا..
عندك فرص تانية و دي افضل اللي لسة طلبة او متخرجين جديد زي انك تكمل دراسة برا بس هتحتاج
فلوس و لغة زي الدراسة في هولندا والمانيا و فرنسا و غيره..لو عندك فرصة لتعلم لغة جديدة و معاك
فلوس كويسة تقدر تقدم باذن الله علي انك تكمل ماستر ف المجال بتاعك و هناك تقدر تشتغل ف مجالك
و تاخد الاقامة الدايمة اما لو مش معاك فلوس ف تقدر تجيب منحة للدراسة ف المجالات دي اعمل ايلتس
اكاديمك و خلي شهاداتك معاك فيه منها كتير جدا تقدر تقدم فيها وبنسبة كبيرة هتتقبل لان المجالات
دي نادرة...عموما مجالات الهندسة و العلوم هي اكتر مجالات مطلوبة و مش هتغلب وليها طرق كتير .
ثالثا لو انت خريج كليات زي تجارة اداب حقوق السن ..كليات نظرية ف عندك حلين
لو انت معاك فلوس هتقدم فورا علي دراسة برا في مجالك في اوروبا..ليه اوروبا لان معظم الجامعات
فيها ببلاش او رسوم قليلة لكن احتياج الفلوس لانك بتدفع ضمان مالي بحيث انهم يضمنوا انك هتعرف
تعيش و تكمل هناك
هتضطر تدرس لغة تانية و تقدم علي الدراسة
اما لو مش معاك فلوس ف هتجهز ورقك و لغتك سواء ايلتس او لغة تانية و تحاول تقدم علي
منحة...معرفتش تجيب منحة هتاخد طريق مختلف و هو انك تسافر تشتغل ف الخليج و من هناك تقدم علي
دراسة في الخارج
ميزة الكليات النظرية ان فيها منها كتير عامل joint master (ماستر مشترك ) مع جامعات برا زي سياحة حلوان و السن و لغات وترجمة الازهر ..و مش لازم تكون خريج نفس الكلية عشان تقدم عالانوع دي من الماستر ...ده هيكون اسهل طريق ليك لو لقيته و مش معاك فلوس تدرس علي حسابك..هيكون اختيار حلو و رسوم انك تاخد ماستر زي ده مش كبيرة!
لو انت مستعجل و محتاج تسيب البلد دي بسرعة و امكانياتك محدودة...
فيه دول جديدة قوية زي تركيا و دي بتنزل منح للدراسة فيها حاليا لكل المجالات و كمان تدرس هناك
تركي و فيه ماليزيا و سنغافورة و دول حاليا من اجمل البلاد اللي تروحهم و ماليزيا مش محتاج لها فيزا
للدخول من مصر..و برضه بتقدم منح للدراسة
تقدر تبحث عن شغل ف البلاد دي و تاخد فيها اقامة دائمة و فيه دولة زي جورجيا دخولها سهل جدا
للمصريين حاليا واعرف ناس فيها زي جورجيا بس برضه مش بقوة تركيا و ماليزيا.
فيه دول جنوب شرق اسيا بس ما انصحش حد بيهم الا لما يكون معاه اللغة ..بس لو معاك لغة من اللغات
النادرة دي زي الصيني والياباني و الكوري ..تقدر تقدم بيهم علي شغل في اوروبا و امريكا لان اللغات دي نادرة هناك و محتاجين ناس ليها
اما الولايات المتحدة الامريكية ف هجرتها عن طريق الدراسة بس محتاجة فلوس بالكوم كذلك الهجرة لاستراليا و كندا عن طريق الدراسة..القرعة الامريكية فرصتك 1 ف المية بس انك تكسب و تاخد اقامة دائمة (جرين كارد).
لو انت بقي معندكش اي استعداد حاليا لاي شئ او مستعجل جدا او عاوز تمشي بسرعة و تروح اوروبا و مستغني عن كل حاجة في مصر
..ف ما عليك الا بخطوة انك تروح تشتغل في شرم الشيخ او الغردقة او مرسي علم و تتجوز من اجنبية و دي اخر خطوة ممكن تاخدها لو يئست ������
و دي حاجة نسبية بتخلتف من شخص للتاني لان فيه ناس بتقول انا ما اتجوزش عشان مصلحة
و فيه ناس بتقول عادي ما انت بتتجوز البنت المصرية عشان جميلة او عشان اهلها كويسن لو وحشة او اهلها وحشين مش هتتجوزها (مصلحة برضه بس بشكل تاني ) .
وان في حديث الرسول عن الزواج ان من ضمن الحاجات اللي الراجل بيختار عليها الست هي النسب .. ف كل واحد و هو شايف الانسب له و الافضل له !
دي نقطة زيادة عاوز اضيفها للناس اللي عاوزة تدرس لغات
الانجلش : ده مش هنحتاج فيه لكورس..لان بقي لنا ف المدارس 20 سنة بندرس قواعد ف الحل انك تذاكر و تمارس كتير عن طريق الماتيريال و الكتب و الفيديوهات والمواقع اللي بقت مرمية ادامك ف كل حتة علي النت..تقدر قبل ما تعمل امتحان الايلتس تعمل IELTS simulator ده تجريبي هيكلفك بس 200 جنيه احسن ما تعمل ايلتس حقيقي و تتلسع ف 2150 جنيه !
الالماني : جوتة او DFA او مجموعة عند مدرس خاص لو عاوز تنجز و اي حد عاوز حاجة ف الالماني بالذات يقولي .
الفرنساوي : المركز الثقافي الفرنسي ف المنيرة
فيه لغات حلوة زي الهولندي والفنلندي و السويدي لو انت بتحب اللغات فعلا و عن طريق دراستك ل لغة من دول تقدر تجيب منح للماستر و الدكتوراة في الدول دي بسهولة خصوصا هولندا و السويد
الصيني : المركز الثقافي الصيني ف الهرم
لو عاوز تشتغل في الخليج بلاش مكتب قدم علي النت و متروحش مكاتب خصوصا في الوظايف اللي مش في مجالك زي الكول سنتر و الفنادق و المكاتب .
ابدأ في سكتك و امشي و متخليش اي حد يحبطك و اعرف ان مفيش حاجة تستاهل تبكي عليها و لو
لقيت الطريق صعب و متعب اعرف انك كدا ماشي ف السكة الصح لان مفيش حاجة بتيجي بالساهل عشان
تقدر تعيش حياة كويسة..
نقلا عن / Mohamed Tarek
تعليق