Occupational English Test
أولا اختبار ال OET هو اختبار مهني للغة الانجليزية بديل للايلتس لمن يريد أن يعمل فى استراليا ونيوزلندا وسنغافورة وهو صالح للأطباء والتمريض والعلاج الطبيعي والصيادلة وكل من يعمل فى المجال الطبى على وجه الخصوص.
مدة صلاحيته زى الايلتس سنتان.
المقارنة بين ال OET & IELTS صعبة وكل واحد ظروفه بتختلف عن التاني وكل واحد له مميزات وعيوب .
مميزات ال OET :
1- اختبار اللغة فى السياق الطبى ودى ميزة كبيرة جدا هتنفعك بإذن الله كمان مع الشغل يعني هتعرف تكتب خطاب تحويل كويس لمريض وهتتعلم ازاى تتواصل مع المريض وازاى تسأله وتنصحه وتطمنه على صحته وتحذره وتقوله معلومات وهكذا.
2- الاختبار ممكن يكون أسهل نسبيا من الايلتس لأنه بيعتمد على technique أكتر من الايلتس بمعني ان ال technique ممكن يرفع ال score فى الايلتس ½ درجة كحد أقصي بغض النظر عن لغتك أما فى ال OET ممكن يرفع سكورك بطريقة لاتتخيلها وهشرح ده بعدين
3- مش هتبقى مضطر تعرف كلمات اكاديمية كتير أو قواعد كتير زي الايلتس بس هتركز شوية مع المصطلحات الطبية اللى هي أساسا شغلتنا كل يوم مع بعض الأزمنة في الجرامر بالتحديد.
عيوب ال OET :
1- الامتحان مكلف 587 دولار استرالي على عكس الايلتس الرخيص يعنى ممكن تدخل 4 اختبارات ايلتس بثمن اختبار واحد OET
2- الايلتس هيحسن لغتك فى المواقف العامة كل ما تذاكر أما ال OET لا
3- Listening in OET is more tough than IELTS
4- مصادر المذاكرة شحيحة والكورسات على النت غالية جدا
ال OET عشان تعدى لازم تجيب A or B فى كل الأجزاء فى امتحان واحد
Score C, D or E in one section means fail.
ال A فى ال OET تقابل 8 الى 9 ايلتس
ال B تقابل 7 الى 7.5
ال C تقابل 6 الي 6.5 وهكذا
الاختبار بيتعمل كل شهر تقريبا وموجود فى الاسكندرية ودى مواعيده من الموقع الرسمي http://www.occupationalenglishtest.o...spx?tabid=2536
نيجي للمهم ألا وهى أجزاء الامتحان :
1- Reading
النجاح فيه من 65 % فما فوف وهو عبارة عن جزئين Part A & part B
Part A نسبته 33.3 % من ال reading مدته 15 دقيقة عبارة عن 4 باراجرافات غالبا بحث او ما شابه والسؤال بيكون تلخيص للكلام المكتوب في باراجراف واحد ومطلوب منك تملأ من 26 الى 35 فراغ بكلمة الى 3 كلمات بحد أقصى. الجزء ده مشكلته الوقت بس لو كنت بتعرف تعمل skimming كويس من غير قراءة ممكن تجيب 19 من 26 . الجزء ده بصراحة صعب جدا بس انت وشطارتك والتارجت بتاعه 50 % لو جبتهم هيبقى كويس وسكور الجزء التانى هيعوض معاك.
Part B نسبته 66.6 % تقريبا من ال reading مدته 45 دقيقة عبارة عن passage 2 زي الايلتس كل قطعة عليها 10 اسئلة MCQ . أسهل كتير من الايلتس . طبعا لو حليت ال 20 سؤال هنا كلهم صح هتجيب 66.6 % وتعدي بدون ما تحل ولا كلمة في part A . عشان كده part B هو اللي بيسند part A
ال Trick فى الجزء ده انك اوعى تعتمد على معلوماتك الطبية فى الاجابة غالبا بتبقى غلط عشان يضللك.
2- Listening
النجاح برده من 65 % فما فوق وهو عبارة عن جزئين Part A & part B ومدته 30 دقيقة تقريبا
Part A عليه 50 % وبيكون عبارة عن محادثة بين دكتور ومريض أو صيدلى ومريضة أو ممرضة ومريض وهكذا. يعتبر أصعب جزء في ال OET ككل وربما أصعب من الايلتس. المطلوب منك انك تسمع وتعمل note taking في الفراغات عن كل حاجة بتسمعها يعنى ممكن تلاقى عنوان مثلا current complaints وتعيش مع نفسك وتكتب كل حاجة بتسمعها وهكذا .
Part B عليه 50 % وبيكون عباره عن مونولوج يعنى واحد بس بيتكلم عم موضوع طبى ممكن تكون محاضرة في الجامعة أو في الراديو ودى سهلة نسبيا ونظام الأسئلة ممكن يكون زى الايلتس فيه فراغات وmatching وصح وخطأ و MCQ وهكذا. طبعا سرعة المتحدث بتزيد مع الوقت بس بصورة عامة الجزء ده أسهل وممكن تعوض صعوبة الجزء الأول.
طبعا في الاستماع بصفة عامة فى ال OET او الايلتس لازم تقرأ الأسئلة بسرعة قبل ماتسمع وتحاول تتنبأ بالاجابة .
3- Writing
عبارة عن خطاب تحويل لمريض والخطاب بيكون ليه طريقة معينة فى الكتابة من حيث الشكل والمضمون وده سهل التدريب عليه من ال sample letters . طبعا بيعطيك case notes عن المريض بتواريخ محددة شامل تاريخه المرضى والشكوي الحالية وتطور الحالة وهكذا . والمطلوب منك تحول ال notes الى باراجرافات فى خطاب . . مدة الخطاب 45 دقيقة منهم 5 دقائق للقراءة فقط بدون استخدام القلم أو الكتابة ....بصفة عامة الرايتنج هنا أسهل من الايلتس بمراحل و كان عقدتى فى الايلتس بصراحة . نسيت اقلكم انى دخلت ايلتس 7 مرات كل مرة أجيب 7 فى كل حاجة واحيانا 7.5 و 8.5 الا الرايتنج 6.5 لحد ما ربنا تاب عليا وامتحنت ال OET وعديت من أول مرة . هيييحححححححححححح أيام . طبعا مصدقتش لما جبت A في الرايتنج
عشان تجيب B علي الأقل لازم عدد أخطائك فى الخطاب لا تزيد عن 6 أو 7 سواء spelling, grammar, punctuation وهكذا. عدد الكلمات من 180 الى 200 كلمة . طبعا لازم الخطاب شامل 4 حاجات ( استيفاء الشكل والمضمون ملائمة اللغة المستخدمة - فهم الغرض من الخطاب - ملائمة القواعد والترابط - قوة التحكم فى اللغة والترقيم )
4- Speaking
20 دقيقة تنقسم الى 3 أجزاء . أول جزء بيسموه warm up conversation ومدتها 5 دقايق يعنى تسخين وتحضير للجزئين التانيين وبتكون أسئلة عامة عن اسمك ومهنتك وليه اخترتها وكده والجزء ده مش داخل فى التقييم.
الجزء التاني والثالث عبارة عن role plays انت بتكون الدكتور والممتحن بيبقي المريض. بتاخد ورقة مكتوبة عن الحالة وتشخصيها والحاجات المطلوب منك توصلها للمريض أو تشرحله مرض معين بدون ألفاظ طبية صعبة وتعطيه نصيحة أو تحذير أو تطمنه على حالته وازي تقنع المريض بالذات لو كان demanding patient, not easy to be convinced .
مسموح ليك ب دقيقتين تحضر نفسك فيهم وتكتب notes ممكن ترجعلها لما تبدأ ال role play.
طبعا الممتحن مش هو اللى بيقيمك بيبقى فيه تسجيل بيتبعت استراليا وفيه اتنين بيقيموك . عشان كده ممكن تقرأ ال notes اللي كتبتها فى الورقة ومش مهم تبص للممتحن. بس لازم تكون واخد بالك من الكلام والاسئلة اللي بيسألها عشان ممكن تبص للورقة وتقول كلام وهو بيسألك عن حاجة تانية.
لازم تخلص ال role play فى 5 دقايق .
حفظ بعض التعبيرات فى هذا الجزء مهمة جدا عشان ال communication يكون سهل ومتألفش كتير.
فى النهاية لازم تعرف ان ده امتحان انجلش ومش امتحان في معلوماتك الطبية .
=======================================