نقلا عن م. وليد الكيال جزاه الله عنا كل خير
أكملكم الحوار ألي دار بيني و بين نفسي فس ساعة صفى و كان قرب يتقلب لخناقه في الأول بس ربنا ستر --
بس من الواضح إن الخناقه و الحوار مازال مستمر تعالوا نشوف باقي الحوار
نفسي: زهقتنا يا عم الحج بإستراليا بتعتك دي عمال تنشر صور و معلومات عنها لغاية ما حسستنا أنها
الملجئ و الملاز لحل جميع مشاكلنا لغاية لما دمعتي قربت تنزل !!!!
أنا: خير بس دمعتك تنزل ليه كل حاجه بالبحث و الترتيب و التخطيط بالأخذ بالأسباب و توفيق المولى عز وجل ممكن تمشي - شكلك كده ما فهمتش حاجه من الحوار ألي فات
نفسي: لأ فهمت
أنا: طيب لخص ألي فات كده
نفسي: ألي أنا فهمته كالتالي
أنا لو عاوز أهاجر إستراليا لازم أحقق التالي:
1- وظيبفتي لازم تكون مطلوبه في ال SOL أو ال CSOL و يا حبذا لو في الأثنين
2- ال SOL هي القائمة العامة لأستراليا و ال CSOL هي قائمة الوظائف المطلوبه مخصوص لكل ولايه من الولايات السبعه لأستراليا
3- عرفت إزاي أبحث على الوظيفه بتعتي سواء بالمسمى بتاعها أو بالرقم بتعها في الموقع ده .............
4- عرفت إن مافيش هجرة بدون معادلة شهادة التخصص بتاعي و عرفت أن جهة المعادلة بتعتي بتبقى مكتوبه قدام أسم الوظيفه في الجدول أو في الموقع ده
http://www.anzscosearch.com/search
و عرفت أني لازم أدخل على الموقع بتاع جهة المعادلة و أعرف أيه المطلوب للمعادلة
5- عرفت أنه فيه نوعين من الفيز للهجرة لأستراليا هي 189 و 190
ال 189 هي فيزة مستقله لهجرة العماله المهرة لأستراليا و تدي بتديني إقامة دائمه في أستراليا
صلحيتها 5 سنوات و بتسمح لي بالعمل في جميع أنحاء أستراليا و ينفع كمان أصطحب أسرتي معايا و كمان
ممكن أقدم بيها على الحصول على الجنسيه - أما 190 هي فيزة لهجرة العماله المهره عن طريق ترشيح
ولايه من الولايات المحتاجه الوظيفه بتعتي ولازم أحقق الشروط ألي طلباها و دي هاعرفها من موقع
الولاية نفسه و دي بتديني إقامة دائمة في إستراليا صلحيتها 5 سنوات مشروطه بالعمل و الإقامة لمدة
سنتين في الولايه ألي رشحتني و بعد السنتين أقدر أشتغل في أي مكان في أستراليا و طبعا ممكن
أصطحب أسرتي معايا و كمان ممكن من خلالها التقدم للحصول على الجنسية الأستراليه
6- عرفنا إن في برنامج عام أسمه Skill Select وهي المسئول عن منح تأشيرات الهجرة سواء كانت ال 189
أو ال 190 و البرنامج ده علشان يقبل أنه يشوف ورقي و يقبل طلب الهجرة بتاعتي بيعتمد على جمع عدد
معين من النقاط و هو 60 نقطه
ال 60 نقطه ممكن يكونوا
60 نقطه أو أكثر من تحقيق الشروط المطلوبه و كده بحصل على الفيزا 189
أو ال 60 نقطه ممكن تكون 55 نقطه + 5 نقط ترشح ولايه وكده هحصل على الفيزا 190
أو ال 60 نقطه ممكن يكونوا 55 نقطه + 5 نقط معادلة للزوجه لوظيفه مطلوبه وكده هحصل على الفيزا 189
7- عرفنا أن نقط ال Skill Select بتتحسب على أساس
السن
اللغه
نوع المؤهل الدراسي
عدد سنين الخبرة بشرط تكون بأجر في مجال الدراسه المتعلقه بالوظيفة المطلوبه
8- عرفنا إن الخطوات كالتالي بالترتيب
اللغه
المعادلة
ال EOI طلب إبداء الرغبه في الهجرة
ال Invitation الو الدعوة (ليست فيزا )
أرسال الأوراق و الأبليكيشن و تسديد المبلغ المطلوب حسب عدد الإفراد المجودين في الأبليكيشن (الزوجه و الأبناء)
الكشف الطبي لكل من هو مسجل في الأبليكيشن
الحصول على التأشيره
---------------------------------------------------------------
شوفت بقى يا معلم أني فاهم كل حاجه أهه
أنا: أمال مالك زعلان ليه ليه و محسسني أني عملتلك البحر طحينه
نفسي: بص ياعم أنا مش هعمل أي خطوه من الخطوات ألي فاتت ألي لما تجاوب على الأسئله ألي في دماغي علشان أنا الفار بيلعب في عبي
أنا: أتفضل سعدتك أسأل
نفسي: أنت قلت إن الفيزا صلاحيتها 5 سنوات يعنى أنا هروح أتحبس هناك 5 سنوات أفرض زهقت و مشتغلتش و عاوز أرجع بلدي أو الخليج هيضيع عليا الفلوس ألي دفعتها و أخرج من المولد بلا حمص ؟
أنا: ياعم مين قال إنك هتخسر الفلوس بتعتك أفهم كويس أنا قلت صلاحية الفيزا 5 سنوات مش مدتها 5 سنوات بمعنى انك لما تستلم الفيزا بيكون عليها تاريخ صلاحية زي الذبادي كده ينتهى في تاريخ معين بعد ال 5 سنوات يعنى أنت مش هتقدر تدخل أستراليا بعد التاريخ ده وكده هتحتاج تبدأ من الأول في إجرائات الهجرة علشان تفعل الفيزا دي و تكون صلاحيتها مدى الحياه هو إنك تدخل أستراليا و تاخد ختم الدخول على البسبور على الجواز فقط حتى لو قعدت هناك 24 ساعه فقط
نفسي: و أنا أستفدت أيه يا عم الحج
أنا: هتستفيد حاجات كتير أولا أن الفيزا بقت مدى الحياه ثانيا لو أنت شغال في الخليج مثلا و عقدك لسه مخلصش و عاوز تكمله ممكن تكمله و ترجع تروح أستراليا ممكن كمان ممكن تستغل و جودك هناك و تدور على شغل و تعمل مقابلات
نفسي: شكلك فاهم يا نصه - طيب ياعم أنا قررت أنا هسافر على طول من أول مره و أستقر هناك أعرف منين أن المرتب ألي أنا ممكن أخده هيكون كام و أعرف أقارنه بالمرتب ألي باخده هنا في شغلى علشان أعرف راسي من رجليا و ماروحش أخذ بومبه
أنا: ده سؤال كويس جدا بس أنت ممكن تعرف متوسط الراتب بتاع الوظيفه بتاعتك كام عن طريق الموقع
http://www.anzscosearch.com
الموقع ده قال لي مثلا إن متوسط الراتب يتاعي السنوي 100 ألف دولار في السنه
و في موقع تاني ممتاز ممكن أعرف منه المرتبات المعروضه للوظيفة بتاعتي و الشروط المطلوبه
http://www.seek.com.au
يعني مثلا لقيت وظيفة ليا تناسب التخصص بتاعي و بقول أنا الراتب يتراوح من 95 ألف دولار - 110 ألف دولار سنويا حسب الخبره
نفسي: 100 الف على خمششاشر عششششرين يااااه يعني 9000 دولا في الشهر في 8 جنيه الدولار يعنيييييييييي ياله يا عم الحج نلم الشنط و نطلع
أنا: حيلك حيلك ده المرتب قبل الضرائب
نفسي: رجعنا للكلام البايخ أدي الشنطه و الهدوم - ما أنت كنت ماشي كويس و بتقول درر أيه موضوع الضرائب ده
أنا: طبعا في ضرائب تصاعدية حسب الدخل لأنك بتستمع بالتأمين الطبي المجاني و التعليم المجاني للأولاد لغايه الجامعه و ممكن تاخد إعانة بطاله سواء ليك أو لزوجتك عن كل طفل و طبعا الضرائب دي بتاخد قصدها خدمتات مش بتتقلب زي ناس
نفسي: يعني أنا أخش على الموقع و أبعت السي في الأول و لما يبعتوا العقد أمشي في الأجرائات ألي فوق صح
أنا: ههههههههه لا طبعا عشم أبليس في الجنه ولا هيعبروك
نفسي: تصدق أنك غلس و طيب هتصرف إزاي
أنا: لازم تكون هناك علشان تحصل و ظيفه
نفسي: طيب خلينا من الموضوع ده دلوقتي- دلوقتي أنا أعرف الضرائب دي بتتحسب إزاي ؟
أنا: في برنامج ممتاز على الموبيلات أسمه Australia Taxes calculator ممكن تدخل في الدخل السنوي هيطل لك الصافي بعد خصم الضرائب يعني مثال في الحاله بتاعتنا المرتب السنوي 100 ألف دولار يعني في السنه صافي 71800 دولار في السنه + 9250 معاش تقاعد يعني في الشهر حوالي 6000 دولا + 770 معاش تقاعد و لو زوجتك مش بتشتغل و عندك مثلا طفلين هتاخد 370 دولار X طفلين يعني ضيف كمان 740 دولار يعني التوتال الشهري حوالي 6750 دولار
نفسي: بس يا عم الحج تحسبا أنك كل شويه بيطلع منك كلام ينرفز أنا مش هفرح بالمبلغ ألي أنت بتقول عليه مع أن الأله الحاسبه ألي في دماغي أشتغلت على طول علشان كده هسألك سؤال لولبي لولبي أنا أعرف منين إن المبلغ ده هيكفيني أكل و شرب و إيجار و بنزين سياره و أنترنت و موبيلات و فسح ؟
أنا: واحده و احده يا عم الحج لو مثلا قلت لك إن كيلو الرز في أستراليا ب 3 دولار تقول أيه
نفسي: كيلو الرز ب 3 دولا X الدولا ب 7.5 جنيه يعني الكيلو 22.5 جنييييييييه ليه
مش قلت لك من الأول أنك عبيط و مسمعتش كلامي أدفع المبلغ ده في كيلو رز
أنا: كويس أنا عارف أنك هتحسب كده و أنا متوقع منك كده لو فضلت تضرب الدولار في سعره بالجنيه هتفضل محلك سر و أحسن لك تهاجر أسكندريه أوفر لك
نفسي: أمال أحسب إزاي ياعم الفالح ؟
أنا المفروض لو أنت بتاخد في بلدك مثلا ال 6750 جنية في الشهر و بتصرف مصاريف ثابته في الشهر (أكل و شرب + مدارس لو خاصه + بنزين و مصاريف السيارة + كهربه + مياه + غاز + فواتير موبيلات + فواتير تيليفون بيت + فواتير النت + الفسح + قسط الشقه ألي في التجمع الخامس أو الإيجار ) مثلا المجموع طلع 6000 جنيه في الشهر يبقي أنت بتوفر 750 جنيه في الشهر و طبعا كداب لو قلت كده لأنك أكيد في أخر الشهر بتخبط على بيت الحج و تقوله الغدى عند حضرتك النهارده
فالمفروض تحسب المصاريف الثابته دي في أستراليا كام في حالة إنك أخدت نفس الراتب بس بالدولار طيب حسبت و لقيت أنك بتصرف تقريبا 3500 دولا في الشهر يبقى سعدتك و فرت كاااام
نفسي: طيب سعدتك أنا هعرف المصروفات دي إزاي علشان أحسبها
أنا: عاوز تحسب أيه مثلا
نفسي: خزين البيت الشهري
أنا: بسيطه أعمل قائمه و أكتب فيها أنت بتحتاج في الشهر قد أيه فراخ و لحمه و زيت و سكر و سمك و بطاطس و .......... و أحسبهم بالجنيه و عدين أدخل على المواقع ده و أحسبها بالدولا -- هقولك معلومه صغيره جدااا بس مش عاوز شتيمه كيلو للحمه ألي 80 جنيه هناك ب 17 دولا - كيلو سمك السلمون ألي ممكن ما تكلوش في حياتك و تتفرج عليه بس 12 دولار - ال 12 بيضه ب 4 دولار - لتر اللبن 1.8 دولار الي هو ب 8.5 جنيه - كيلو الفراخ البنيه 11 دولار ألي هو 46 جنيه - كيلو الجمبري الجامبوا 21 دولار ألي هو 150 جنيه و ممكن تحسب الحزين بتاعك من المواقع دي بس بالله عليك بعد ما تتفرج مش عاوزين شتيمه
http://www.iga.com.au/
http://www.harrisfarm.com.au/
http://thomasdux.com.au/
http://www.woolworths.com.au///conne...te/Woolworths/
http://www.coles.com.au/
نفسي: كيلوا اللحمه ب 17 دولار - طيب أنا مؤدب و مش هفتح بوقي - طيب أيه نظام خطوط التيليفون
أنا: تحب تتصدم ؟
نفسي: أشجيني
أنا: أي فون 6 ال 64 جيجا + مكالمات و رسائل غير محدوده لأي شبكه + 9 جيجا بيت أنترنيت (بيانات) = 90 دولار في الشهر عقد لمدة 24 شهر أحسب كده بالجنيه العرض ده هتاخده بكام و مش عاوز ضرب و شتيمه و لو عاوز تعرف أكثر أدخل على الموقع ده
http://www.whistleout.com.au/MobilePhones
نفسي: بص بقه لغاية كده أنا ماسك نفسي بالعافية - طيب أي نظام الإيجار و السكن؟
أنا: بس يا باشا أنت لو حبيت تأجر شقه مثلا في التجمع الخامس مثلا بتعمل أيه ؟
نفسي: يا أما بفتح الوسيط أو أهرام الجمعه و أدور على الشقق للإيجار و طلع أرقام السماسره أو أصحاب الشقق أكلمهم و أحدد معاهم ميعاد و غالبا الميعاد ده بيضرب أو بروح ألاقي الشقه كاتبها 100 متر تطلع في الأخر 50 متر و لو كانت تشطيب سوبر لوكس غالبا بروح ألقيها زباله و فين و فين لما أقلاقي واحده و بعدين يقولى معلش أصل السعر ألي مكتوب في الأعلان غلط الإيجار 2000 جنيه بدل من 1000 جنيه
أنا: ده مش بيحصل هناك ليه لأنك بتدخل على موقع معين بتحدد المنطقه ألي عاوز تسكن فيها و نوع السكن يعني شقه أو فيلا أو منزل (هاوس) وتحدد رنج الأيجار الأسبوعي لأن هناك بيندفع بالأسبوع و تحدد عدد الغرف و عدد الحمامات و عدد أماكن بارك السيارة و كام سياره هيكفوا البارك و لو عاوز حمام سباحه و هل تسكن و تاخد الكلب أو القطه معاك ولأ و هل عاوز حمام سباحه ولا لأ و بعدين بعد ماتطلع النتائج تدخل تتفرج على السكن من جوه و تشوف التشطيب و المساحات و تشوف حمام السباحة موجود ولا لأ و بعدين تشوف المدارس ألي حوليك و المستشفيات و الصيدليات و الجيم و المطاعم و ممكن تعرف كام نسبه سكان الحي أو المنطقه و توزعهم هل النسبه الأكبر عائلات و لا شباب و أي نسبه أكبر و نوع تخصص و ظائفهم و الأجمد من كده ممكن تخش تشوف الشارع ألي فيه السكن بالجوجل أيرث لدرجه أنك هتشوف الناس و هي ماشيه في الشارع و الله زي ما بقولك كده - بعد كله ده تنزل أبليكشن من عند الشركة ألي عارضه الشقه و تبعته و بعدين هيردوا عليك بموعد المعاينه - كل ده أنت عملته و أنت قاعد على النت و متحركتش من مكانك - و العجيب أن كل الشقق في نفس المنطقه سعرها مقارب جداا من بعضه - طبعا الموقع ده ليه أبليكيشن على الموبيل و ممكن كمان بصوباعك ترسم دائره على الموقع ألي بتبحث فيه و طبعا ليه موقع على النت كمان وهو
http://www.domain.com.au/
نفسي: يا فتاح يا عليم يا رزاق يا كريم اللهم صبرنا - طيب أسعار العربيات الجديده و المستعمله ؟
أنا:بسيطه خالص أيه رأيك نركب جيب شروكي و لا كامري ب 20 ألف دولار ولو عاوز عربيه ب 6000 دولار هتلاقي
نفسي: أتريق أتريق
أنا: لا تريقه ولا حاجه أدخل على الموقع ده و شوف بنفسك
http://www.carsales.com.au/all-cars/search.aspx
نفسي: طيب أيه نظام المدارس ؟
أنا: المدارس الحكوميه بالمجان لغاية الجامعه ختى الكرسات و الكتب و الملابس
نفسي: طيب نفترض أنا عاوز أدخل مدرسه إسلاميه فيها عربي و دين ؟
أنا: أيه المشكله المدارس الأسلاميه كتير وليها فروع في كل ولايه و أرخص من كندا و مصارفها بتتراوح من 1700 دولا - 2700 دولار في السنه الموقع ده فيه جميع المدارس الأسلامية
http://www.aussiemuslims.net/index.php option=com_sobi2&catid=20&Itemid=49
نفسي: أزنقك إزاي أزنقك إزاي ؟ شوف السؤال ده هو أنا لو دخلت أستراليا هعرف أخرج تاني و أرجع؟
أنا: طبعا بتعمل تصريح خروج و عوده كل ما تحب تخرج
نفسي: أحرجتني - طيب أنا أروح الأول أحسن لوحدي ولا مع العائله؟
أنا: أحسن تروح لوحدك في الأول لأسباب كتيره هتحتاج تتنقل بين الولايات علشان مقابلات العمل و ممكن تضطر تسكن في سكن مشترك و هتوفر في المصروفات و سعر تذاكر الطيران - ولازم تعمل حسابك يكون معاك فلوس تكفيك حوالي سنه يعي حوالي 10 ألف دولار تقريبا
نفسي: طيب لو عاوز أعرف أسعار الأدوات الكهربائيه علشان لو حبيت أسس سكن؟
أنا: سهله خالص أدخل على الموقع ده
http://www.appliancewarehouse.com.au/
نفسي: طيب أنا رحت و أستقريت في سكن هدور على شغل إزاي؟
أنا: طبعا معظم الوظائف بتكون عن طريق شركات التوظيف و بيكون ليهم مواقع على النت تقدم فيها على الوظيفه ألي أنت عاوزها و لو الوظيفه مناسبه ليك بيكلموك للمقابله و المراحل القادمه - و طبعا في مرحلة البحث ممكن تشتغل أي شغلانه على الأقل تجيب بيها مصاريفك اليوميه و تكسر رهبة اللغه لغاية لما تلاقي الوظيفه المناسبه
نفسي: سهله جدا أنا أجيب عناوين كل الشركات دي و أروح لازع السي في بتاعي فيهم كلهم
أنا: أموت أنا في شغل المصريين و العرب - طبعا غلط - كتابة السي في ليها أصول و لكل و ظيفه ليها السي في بتاعها
نفسي: أه أضرب سي في يعني فمت
أنا: مش بقولك شغل المصريين و العرب - أفهمك أنا
مثلا في وظيفه مطلوب فيها مدير مبيعات لشركة أدوية مثلا و سعدتك روحت حاطط السي في المحفوظ بتاع كل الناس بال Objective ألي كل ناس بتنقله من بعض و ال Education History ألي كل الناس بتكتب فيه من أول الحضانه لغاية الكليه و تسيب أهم حاجه ألي هو بيدور عليها مدير مبيعات يعني لازم تبن مهاراتك في الأدارة و الكورسات ألي أخدتها علشان تنميها و لازم تبين الأنجازات ألي أنت حقتتها في مجال إدارة المبيعات من الأخر السي في يتعمل لكل و ظيفه حسب الوظيفه المطلوبه - في مواقع بتشرح لك كيفية كتابة السي في بإحتراف
----------------------------------------------------------------------------------------------
كان فيه سؤال: لو عندي حد قريبي هناك يعمل أيه علشان يبعتلي
الجواب: الفيزا دي رقمها 457 و ده لازم يكون ليك قريب من الدرجه الأولى عايشه في الولايه بقاله أكثر من سنتين سواء كان يحمل الجنسيه أو يحمل ال PR و يجبلك عقد عمل و كمان لازم يكون ساكن في حي معين و الأحياء المسموح لسكانها بإصدار التأشيره دي ليها أرقام معينه و مش من السهل يتوافق عليها الأسهل ال 190 أو 189
سؤال: مواقع البحث عن عمل
الجواب :
www.seek.com.au
www.indeed.com.au
Linkedin Job Search
سؤال: فيزة السياحه و قلبها فيزة عمل
الجواب: بإختصار عشم أبليس في الجنه
سؤال: لو الفيزا أترفضت راحت عليا الفلوس
الجواب: نعم - الفلوس بتدفع بعد ما تيجي ال Invitation ولو ورقك مظبوط نادرا ما بتترفض - الرفض الوحيد ألي ممكن يحصل لو لا قدر الله في حاجه في الكشف الطبي لأحد الأفراد المذكروين في الأبليكيشن
سؤال: مصاريف التأشيره
3700 دولار للمقدم الرئيسي و 1750 دولار للزوج أو الزوجه حسب أيهم المقدم الرئيسي و 880 دولار لكل طفل تحت 18 عام
سؤال: إثبات الخبره و الأجر
الجواب : خطاب من الشركه مكتوب فيه التالي
الأسم
الوظيفه
المهام الوظيفيه
تاريخ الألتحاق و الأنتهاء
عدد ساعات العمل
نوع العمل دوام كلي / دوام جزئي
الراتب
توقيع صاحب العمل أو من ينوب عنه + رقم أتصال به + ختم الشركه
إثبات الراتب ( أيصالات أستلام الراتب أو شهادة التأمينات أو تحويل البنك)
طبعا كل ما سبق ذكره لازم يكون بالأنجليزي و لو بالعربي يترجم من مكتب معتمد (مش شرط معتمد من السفارة أهم حاجه إنه يكون ليه سجل تجاري)
سؤال: عن الفيش الجنائي
الجواب : كل دوله جلست فيها أكثر من 12 شهر سواء كانوا متصلين أو منفصلين لازم تقدم صحيفة الحاله الجنائيه عن المده ألي جلست فيها هناك طبعا بالأضافه لبلدك الأصليه نصيحه لو وصلت لمرحلة الدعوه و بدأت تبعت الورق ما تقدمش الفيش الجنائي في الأول بعد 45 يوم بيتعين ليك Officer لفحص الورق بتاعك ساعة لما ميلقيش الفيش الجنائي هيبعتلك يسأل عليه فهو لازم يبعت خطاب للسفارة الأستراليه ألي في البلد المطلوب منها الفيش و بعدين السفارة تصدر جواب لوزارة خارجية البلد و على أساسه حضرتك هتروح بيه تطلع الفيش -- مش هتعرف تطلع الفيش لوحدك من غير الخطاب -- و الحركه دي كويسه علشان تعرف ال Officer ألي ماسك الورق بتاعك و تعرف تراسله
تعليق